Блог

ШТО ЗНАЧИ НИШ (NICHE) ПАРФЕМ?

Меѓу парфемољупците сè попопуларни се ниш-парфемите, кои најчесто, но не секогаш, се поскапи од она што го знаеме како дизајнерски парфеми. Постојат причини зошто е тоа така, но исто има и исклучоци од ова правило. На некој начин, тоа е концепт, мирисна уметност, нешто што не е наменето за широки маси и што само искусни и сериозно извежбани носеви умеат да го ценат.

Според најосновната дефиниција, ниш-парфемите се произведуваат од компании или парфемски куќи кои се посветени само на производство на парфеми. Дополнително, може да нудат и парфимирани лосиони за тело, миризливи свеќи, спреј (мист) за коса, инспирирани од нивните парфеми.

Како тоа да го опишеме со пример? Земете ги, на пример Dior. Тие покрај парфеми, во својата понуда имаат и модни колекции, луксузна козметика и модни додатоци. Значи, тие не се пример за ниш-куќа, иако имаат приватна линија на луксузни мириси кои ги следат основите на ниш-концептот. Исто така, Guerlain долго време произведувале само парфеми, но подоцна ги воведоа и козметичките линии, па за нив може да се каже дека биле ниш, но веќе не се.

Сепак, денеска и нема толку јасна дистинкција меѓу дизајнерските и ниш-парфемите, особено поради тоа што многу ниш-брендови се во сопственост на големи козметички гиганти. На пример Jo Malone London е во сопственост на Estee Lauder, а самата Џо има друга ниш-линија Jo Loves. Парфемскиот гигант Puig е сопственик на Penhaligon’s, додека пак Maison Francis Kurkdjian од 2017 е под LVMH.

Парфемските креатори креираат и за модни брендови, но и за ниш-куќи. Ситуацијата оди до таму што оние мали брендови кои самостојно произведуваат парфеми дури и се нарекуваат инди (indie) брендови. Тоа се парфемски куќи кои се раководат самите, почнувајќи од производство, па се до дистрибуција во парфимерии, но и продажба во нивните специјализирани продавници.

Сепак, она што денеска го подразбираме како ниш, според груба дефиниција и поделба, се креациите кои настанале од брендови и дизајнери кои се посветени само на олфакторни искуства, кои имаат концепт и кои имаат цел. Некои од нив се:

TIZIANA TERENZI

Паоло и Тицијана Теренци се брат и сестра, кои креираат под три основни бренда, Tiziana Terenzi, V Canto и Giardino Benessere. Најпопуларна, секако им е примарната линија, од која најистакнати претставници се Andromeda, Kirke, Ecstasy, Draco и Spirito Fiorentino, но и уште околу 80 други парфеми произведени во периодот меѓу 2012 и 2021 година.

Escentric Molecules

Ова е бренд со потекло од Германија, кој во понудата има 17 парфеми. Од секој има две верзии – основна арома и интерпретација во минималистичка композиција. На пример, Molecules 01 има и свој „партнер“ Escentric 01, кои можат да се носат самостојно или заедно. Во принцип, Molecules 01, 02, 03, 04 и 05 се парфеми од една нота, мирисна молекула, додека пак Escentric 01, 02, 03, 04 и 05 се ненападни композиции базирани на истата нота. Постојат и неколку лимитирани изданија на овие мириси. За нив велат дека се како „духови“ меѓу парфемите – иако се тука, нивниот интензитет се менува, а понекогаш дури и заборавате дека го носите парфемот, додека повторно не се врати во посилен бран.

MAISON FRANCIS KURKDJIAN

Како што веќе кажавме, MFK е дел од LVMH, но ниш-креациите и понатаму се можеби едни од најпопуларните во овој мистериозен дел од парфемската индустрија. Сигурно и самите сте слушнале за ексклузивниот Baccarat Rouge 540, како и за Grand Soir, Oud Satin Mood, Gentle Fluidity Gold и така натаму. Најголемиот дел од овие мириси се унисекс, иако има и креации кои се наменети или за едниот или за другиот пол.

MONTALE

Montale постои од 2003 и основана е од Пјер Монтале, кој живеел во Саудиска Арабија и кога се вратил во Париз, решил парфемската уметност на западниот свет да ја пренесе во ниш-композиции. Она што е препознатливо за овој бренд се алуминиумските шишенца, кои овозможуваат течноста внатре да биде заштитена од светлината. Montale има над 140 парфеми во својата понуда и навистина секој може да најде нешто за себе. Најпопуларни претставници се Starry Night, Intense Cafe, Aoud Greedy, Arabians Tonka, Dark Purple и уште многу други.

ACQUA DI PARMA

Нивниот прв мирис датира уште од 1916. Биле лоцирани во Парма, а денеска се во сопственост на LVMH. Нивните креации, особено од линијата Colonia, биле омилени на многу популарни актери и познати личности, меѓу кои и Ава Гарднер, Кери Грант и Одри Хепберн. Иако нивните денови не биле секогаш светли, во 90-тите, тројца Италијанци ентузијасти се здружија за повторно да ја лансираат оваа ниш-куќа, а во 2003 со договор е регулирана сопственоста на LVMH врз компанијата. Ако сте заинтересирани за автентичниот мирис на Италија, не ги пропуштајте Colonia линијата, Blu Mediterraneo Fico di Amalfi, Magnolia Nobile, Peonia Nobile и уживајте во ова мирисно патување на Медитеранот.